Россин Федерацин а, Дагестанан Республикин а пачхьалкхан совг1аташ д1адаларан гулам д1абаьхьира Доттаг1аллин ц1ийнехь Керла шо т1едог1уш.
Дагестанан куьйгалхочо Меликов Сергейс совг1аташ делира сийлахьчу лоьрашна а, т1еман белхахошна а, 1илманчашна а, кхетош-кхиоран белхахошна а, артисташна а, журналисташна а, дуккха а кхечу нахана а.
Мероприяти схьайоьллуш Меликов Сергейс баркалла элира дагестанхошна, цара махкана а, республикина а пайдехь бечу кхоллараллин балхана. Цо билгалдаьккхира, дуккха а къаьмнийн тайп-тайпана говзаллийн векалш гуламе беана хилар.
«Тахана кху зала чохь тайп-тайпанчу говзаллийн векалш бу, дуккха а ц1ераш хезар йу. Дагестанна а, йерриге а Россина а пайденна, йукъараллехь барт ч1аг1беш, мехкан кхечу регионашна йукъахь республикин ц1е лакхайоккхуш аш кхоллараллин болх барна баркалла ала лаьа суна, х1унда аьлча, вайн къаьмнийн а, халкъан а цхьаалла гойту аш», — элира республикан куьйгалхочо.
«Керла шо вайн махкахь Даймохк ларбархочун шо аьлла д1акхайкхийна ду. 80 шо кхочу адамийн исторехь уггаре а ирча т1ом д1абирзина.
Кхаа шарахь гергга леррина т1еман операци д1ахьош йу. Даймохк ларбар — вайн коьрта декхар а, уггаре а лакхара сий а ду. Цундела суна баркалла ала лаьа дагестанхошна уьш хаддаза Даймохк ларбан кийча хиларна», — элира регионан куьйгалхо.
Леррина т1еман операцехь дакъалаьцначу эскархошна совг1аташ кхаьчна Меликов Сергейн карара. «За проявленное мужество» мидалш йелла сержантана Байбатиров 1усманна а, лакхарчу сержантана Кадимов Арсенна а, лакхарчу сержантана Хасболатов Шахмурдинна а, волонтерашна Халимов Хабибулана а, Халимов Мурадана а, Магомедов Камилна а, сержантана Гаджимагомедов Закирна а, иштта д1. кх.а.
Даймохк ларбеш, т1еман декхар кхочушдарна, майралла, доьналла гайтарна баркалла элира царна республикин Куьйгалхочо.
Могашалла 1алашъйаран белхахошна «Дагестанан Республикан хьакъволу ветеринар», «Дагестанан хьакъволу лор», «Дагестанан Республикан могашалла 1алашъйаран хьакъволу белхахо» ц1ераш йелла; культурин а, дешаран а векалшна — «2018-чу шеран хьакъволу Дагестанан хьехархо» а, «Дагестанан хьакъволу артист» а, «Республикин дешаран хьакъволу белхахо» а, «Республикин культурин хьакъволу белхахо» а ц1ераш йелла.
Совг1аташ даларан гулам берзош, республикин халкъан поэтан Гамзатов Расулан дешнаш а далош, Меликов Сергейс баркалла элира гулбеллачарна, цара шайн корматалла гайтарна а, Дагестан кхиорехь дакъалацарна а.
«Ас к1орггера баркалла боху массарна а дика а, говза а болх барна. Вайн дай баьхначу республикан хьал кхиаме хилийта, аш шайн далуш дерг деш ду. Дерзош, кхин цкъа а массо а декъалван лаьа суна Керлачу Шарца, дало лаьа Гамзатов Расулан дешнаш: «Х1ора шо маь1не дан деза вай, гуттаренна иэсехь дисийта» — элира республикин Куьйгалхочо.
БИБУЛАТОВА Iайнаъ
