КIайн нускал » Нийсо-Дагестан
sitename
Курс валют предоставлен сайтом old.kurs.com.ru
Видео
Свежий номер газеты


КIайн нускал
13.03.2019 88 0 niyso

КIайн нускал

Общество
В закладки
- Вай маца хир ду-те нахах тарделла дехаш!? Буьйсана 1уьйренга довлахьара, 1уьйрана суьйренга довлахьара, кханалерчу дийно х1ун дохьур-те бохуш, палтуьйсуш, д1адолуш ду-кх х1ара дахар… х1а..!     Тишъелла машен ца леташ, глушитело «ах1и-ах1-ах1-ах1» деш, цунна чу са даийта г1ерташ, шен ма-хуьллу хьийза шопар, резавоцуш, цуьнга хьаьжира.  
- Делан дуьхьа, ма йолалохьа х1инца, ишта а бу сан кийрахь бала! – дуькъа сирделла цкъоцкъамаш дусийра 1аламата.
- И-и-и, сонта жималла, х1инца долу хьекъал хиллехьара! – къоьжа корта ластийра Дешис. – х1ара сан б1аьрса –м жима йолуш дуьйна ца хиллий ларт1ехь…  1аламат ц1е йолчу стаге йоьду хьера ца яьлларг?!
- Х1а-а, х1инца сан ц1арна коча еа! Цунах х1ун 1оттадели-те!? 
- Оцу хьан ц1аро цхьа 1аламаташ гойтур ду моьттуш 1ехаеллера-кх!
- Велла вала со дела-1, ахь дийцарехь, ц1аро цхьаъ дан дезаш хилча, хьан ц1аро-м, т1аккха, кху кертахь деши компани кхоьллина хила ма еза! «1аламат дукха Деши» ц1е а йолуш…
- Х1ай-х1ай, «Къеллин 1аламаташ»! – бат саттийра зудчо. – Ма доккха х1ума ду-кх х1ара, суна хьакъ доллу дахар-кхоллам ца хили-кх сан! Ма хаза яра со, ма товш… хьалдолчу бухт1ера… – ша-шех дукха къахетта, елхар а иккхира зудчун.
- Т1аккха, хьо елха дезаш хьал дац, йоккхаеш хила еза, - велавелира х1усамда. – Ч1ог1а «повезло» хилла хьуна!
- И бохург х1ун ду?
- Делехь боккха къинхетам хиларна, адамаша леточу къиношна царна хила ма-деззара шен хьакъ д1а ца кхочу бохург ду-кх.  
- Х1аъ, вела хьо… хьан воьлийла ма ду, - майрчун самукъадаларх ца кхийтира зуда. – Хьо ву бехкениг… сан дахар къахьдинарг!
- Хьан декъазчу дахаран бехкечунна мийра бетта йиш хилча… хьо  а г1атталур яцара-кх, - воьлучура юха ца верзалора 1аламат. – Хьан виран амал ма ю хьо дакъазаяьккхинарг!    
Иштта д1айолаелира оцу дийнахь и хаза 1уьйре.
Х1ара шиъ дуьххьара захалшка хьошалг1а даха новкъадаьллера – жимахволчу к1антана зуда ялийна, х1инца кхузлаг1а марда-марнана а хилла, зудаялоран г1иллакхаш дерзош дара и шиъ.
- Зуда, и хьайн ирачу меттан доладелахь тахана мукъа а…
- Соьгара х1ун даларна кхоьру хьо?
- Дера кхоьру, вайн захалш хьох ца кхетарна… цхьа 1оттар ца йича хьо мегаш ма яц!
- Вайна реза ца хилахь и шайн… йо1 аьлча а… и шайн набаран т1оьрмиг ц1ахь сацор бен, кхин х1умма дийр дарий цара?!
Машенаш некъа йистехьо г1оьртина севцира.  
- Х1ун ду цу новкъахь хилларг? – машен чуьра корта арабаьккхира 1аламата.
- «Пробка» ю.
- Авари-м ца хилла?
-Х1ан-х1а, цхьана хьаькаман нус ю боху гучуйоккхуш… церан машенашна некъ мукъа бита боху…
- Дависа хьо дела1, и аьттонаш болу нах кеманашца лелаш мукъа а белахьара, царна а атта хир дара, вай а маьрша…
Халла д1атийна Деши юха а карзахъелира: 
- И сийна стигал ца тоьаш, къуьйсуш, авареш а еш, вайн коьрта т1е оьгур бара-кх уьш т1аккха а! Дала д1аэцарш!
Х1орш эххар а д1акхечира.
Захалша дукха лерина, сийдина , комаьршша охьадиллинчу шуьне ховшийра керлабевлла гергара нах. Божарий-м башха хабарна т1ера а бацара, эцца хьал-де а хаьттина, шен декхар чекхдаьлла лерира.
Зударийн къамел тасаделлера.
     Дешис шен к1ант хестош, захалша шайн йо1ах малик тардеш. 
- Милана жима йолуш дуьйна къастийна ю-кхи тхан, - дуьйцура несан нанас. – Шен йоккхахйолчу йишех, Моникех, ч1ог1а и тера хиларна… И яллалц дукха яхарг… тера ю аматашца, амалца… ша тап-тера…
- Валлах1а ю-кх , д1адаккха-т1етоха х1ума доцуш-м, - т1етайра Деши а.
- Ойн, хьуна евзара Моника? – цецбевлира зударий.
- Ца евзара, амма и шен йиша санна елла х1ума ю-кх  и сан нус а!
Охх1ай, цул т1аьхьа хилла къематде дийца а хуур дац. 
Ша-ша ала г1ерташ, хьоькху маьхьарий, зударийн ц1ог1а, чоь эккхал г1аьттина г1овг1а.
Цхьадика, «ах1и-ах1-ах1» доцуш, машен сиха д1аэккхийта ларийра 1аламат. 
Х1усамда оьг1азваханера зудчунна.
 Оццул ша туьйсина йоллушехь, шениг ца дити-кх цо!
Г1ам ша ма-дарра!
- Х1ах1, туьйлин хьо? 1ебин?
- Хьайн ши мекх тодехьа цул… - Деши шен коьртара йовлакх нисдеш йоллура.
Куьзгана хьажавелча, боккъал а, дозаллийца хьалахьовзийна ши мекх охьаолладеллера.
1аламат кхин а ирхъиккхира:
- Ахь дукха юхь1аьржах1отторна, т1ехь дика а лаьттина х1орш-м… охьа ца эгаш…  со 1овдал, алахьа, хьо ца евзаш санна… хахкавелла схьавеана волу. Цкъа ц1а кхачийта ахь… ас йийр ю хьуна хьан болх!
Зудчунна и кхерам тоссушехь, машен ша йолччохь иркхоссаелира.
- Хьо х1ун дан воллу, х1ай накъост, х1ай? Хьан б1аьргаш мичахь бу… некъ ца го хьуна… сан машен…приора…селхана эцца йолу… теттина ахча делла… сан дозалла… сан сий дайа г1ерта хьо!!! Со мила ву ца хаьа хьуна… ас х1инцца х1окху Делан сохьта милице… полице…ас хьан ворх1е де букъ т1ехь къематде х1оттадо-кх!  – мохь-орца делира хьалха нисъеллачу машен чуьра схьа. 
Цу чуьра араиккхинчу шопаран мекхаш цхьаъ хьаладирзина, важа охьадирзина дара – сахьтан цхьамзанаша ялх сахьт гайтарехь.
- Х1ах1, х1инца цо йийр ю-кх вайшиннан болх, - не1арх тасаелира Деши.
1аламата доккха садаьккхира. 
1уьйренца дуьйна дацара х1ара де х1окхунна тайна. 
 Да ма ват1арг, муха 1отталур вара оцу «Приорина» т1е. Цуьнан да ледара стаг волчух тера ду – собар дац, вохьа-хьем.
Хьераваьлларг санна шен машенна гуотуьйсуш, багара ара туьйнаш кхиссалуш, маьхьарца 1оьхучу шопарна хьалха бехкалавахана, вистхила г1ертара йиш йоьхна 1аламат:
- Делан дуьхьа, ма ца хууш хили-кх х1ара… хьайн Делан дуьхьа вала-кх суна къинт1ера… хьажахьа …цхьадика…оццул дукха х1ума ца хилла…  Делан къинхетам…
- «К1еззиг х1ума бен ца хилла» -тов, - ша волччохь ирхъиккхира приоран да. – Х1ара-м «с нуля» яй, ца го хьуна… и к1айн нускал санна! 
- Х1инца «юьззина зуда» хили-кх оцу хьан «к1айчу нускалх»! – хаьнт1е ши куьг а диллина, д1ах1оьттира Деши. Дов даьллачохь, хи чохь ч1ара санна, хуьлура иза. – Ахь х1ун до и ц1ог1а хьоькхуш, мера к1ел ши мекх латийна?!
- Х1ах1, делахь, х1ара «заь1ап зуда» шайна а йитий, суна кхин керла «нускал» тардер аша, - машенан дог1анаш схьакхиссира вукхо. – Сан ц1е Турко яц-кх хьуна, шуьга иза охьа ца йиллийтахь! – некха т1е п1елг беттара цо.
- Ч1ич1 ду иза а, - яша а ца ешира зуда. – Оха хьуна кхин «нускал» а тардина, ахь хенахь доьзал болабахь, ас тамаш бо-кх!
Дог доьхначу ц1ийндена к1ордийра церан яппарш:
- Д1асацае и хьайн бат! Хьада яло, машен чухаа, хьайн г1уллакх доцург дитий! - човхийра цо чхьагъяьлла х1усамнана.
Т1аккха Турко ц1е йолчуьнга масла1ате вистхила г1оьртира:
- Хьо сан к1ентан хеннара ву, Турко, цкъа сих ца луш, вайна юкъахь барт хирриг дийр дара-кх вайшимма… х1ара сан, машен аьлча а, аьчкан къеч1алг, йоьхкича а х1ара «селхана эцца…теттина ахча делла…к1айн нускал» суна такхалур дацара… 
1аламат ала г1ертарг вукхо чехдаккха а ца витира:
- И сан бала болуш х1ума дац!
Цкъа а чаккхе хирйоцу дов юкъахдаьккхира керлаяьллачу «Мерседес» олучу машена чуьра охьавоьссинчу къоначу стага. Некъа йистехь хьийзо миска а гина сецнера иза.
Дерригенах кхетта ваьлча, бехк боккхуш, приоран дега хьаьжира:
- Оцу хьан машенна оццул хилла х1ума а дац, х1ара воккха стаг ахь хьийзаваллал. Д1авахийта иза, ас сайна т1елоцу ерриге а харж!
- Суна иза а мегаш ду-кх! – парг1атвелира важа.
1аламат ша х1ун дийр ду ца хууш, д1асахьийзара.
- Делан дуьхьа, жима къонаха, суна ма бег1ийла доцуш нисдели-кх х1ара г1уллакх…  Хьуна иштта зен муха дийр ду? Хьо мила-хьенан ву мукъа а дийцахьа.
- Х1ун бен ду хьенан-мичара хилар, дада, нохчо хила г1ерташ къахьоьгуш воллу-кх со! 
Моха кхуссуш, эццахь шен приора юхаерзош воллу Турко, галваьлла, вахана д1акхийтира «Мерседесах».  
Тапъаьлла тийналла х1оьттира. 
Турко машен чуьра арахьажа а ца ваьхьаш, вахьийна, вог1авелла 1ара, «к1айчу нускалан» руль мара а йоьллина.
«Мерседесан» да, г1адвахана велавелира:
- Турко, тахана пхиъ миллион д1аделла «эла» валош вог1ура со…  Х1инца и хьайн «к1айн нускал» цунна а дерзош, доккхачу тойна кечам бер-кх ахь!
Деши ша йолччохь хелхарехь сеттира:
- Ва-а-а, Турко, д1алаца хьайна,нускал маре доьду хьан!

Автор: АЙДАМИРОВА Машар
Комментарии (0)
Добавить комментарий
Прокомментировать
Кликните на изображение чтобы обновить код, если он неразборчив
Кешнашкахь кхеташо
Кешнашкахь кхеташо
Кешнашкахь кхеташо
27.02.19 Общество
Оьг1азлонах кхехка моха юхаетташ, амма х1окхул ч1ог1а оьг1азваханчу дех и гайта ца ваьхьаш, корта а та1ийна ладоьг1ура к1анта.
Эзар сом
Эзар сом
Эзар сом
06.02.19 Общество
-Стаг, хьо меца вуй? Чай молий ахь?
Кхане - «Орга» журналаца
-Нана, хьоьгахь ерг х1ун ю?-»Орга» журнал ду.
Журналист санна вевзина ца Iа иза
ХХ - г1а б1ешеран доьзткъе уьтталг1ачу шерашкахь журналистикехь къахьега волавелла Борхаджиев Хожбауди. Ша болх бечу газетан корреспондента т1ийра д1аволавелла, коьртачу
Ца доьгIна рицкъ
Ца доьгIна рицкъ
Ца доьгIна рицкъ
16.01.19 Общество
-Хьасипат, ас цхьа хаза х1ума дийца хьуна.











«    Июль 2019    »
ПнВтСрЧтПтСбВс
1234567
891011121314
15161718192021
22232425262728
293031 
все шаблоны для dle на сайте dletop.com скачать