Алихан, хьо воцуш цхьа шо дIадели… » Нийсо-Дагестан
sitename
Курс валют предоставлен сайтом old.kurs.com.ru
Видео
Свежий номер газеты


Алихан, хьо воцуш цхьа шо дIадели…
19.12.2018 791 0 niyso

Алихан, хьо воцуш цхьа шо дIадели…

Общество
В закладки
Зама. Дуьне. Адамаш. Доттаг1ий. Вон – дика. Де – буьйса. Б1аьсте. 1а. Аьхке. Гуьйре. Валар – висар. Вер – ваккхар. Адмалла. Яьхь. Г1иллакх. Доьналла.   Ма дукха  ю – кха т1адам а буьллуш,  юьззина маь1наца чекхйолу цу  предложенин цхьанатайпанара и меженаш… Халахеташ делахь а, шен т1аьхьа дукха т1адамаш бахка беза  дешнаш а, г1уллакхаш а нисло – кх вайн чолхечу дахарехь, кхолламехь, дуьненахь… Адаман 1ер – вахар а ду – кх цу юкъа дог1уш…
… Зама – м хьаьдда, иккхина йоьдуш ю. Иза сецо, юхаийза, хийца, юхаерзо  вайгахь цхьаьнгехь а  ницкъ а бац. И иштта хилар дика а ду. Ша дерриг Делера хилар билгал долу кхузахь. Цо йинчу ваь1дина, шеко йоцуш,  вай реза а ду. Кхечу тайпанара хуьлийла а дац.
… Дуьне . Иза а ду Аллах1 Делан лаамца хьийзаш. Де – буьйса т1ек1ел луьстуш.  Уьш шерашка дерзош. Вон – дика нисдаларх замано а, дуьнено а шен некъ д1акхоьхьу. Бисинарш 1ан безаш нисло. Иштта ду – кх кхолламан сизаш…
… Адмалла. Яьхь. Г1иллакх. Доьналла. Майралла. Нохчалла. И ша дерриг шегахь долуш  кхиамца кху харцчу дуьненахь чекхвала луш ша верриг ца хилар, шеко йоцуш ду, ала ваьхьар ву со. Цундела вовшашца к1оршаме доцуш, к1еда – мерза хила дезара вай, адамаш, боху ойланаш а хьийза шерашца къежлучу коьрте. 
Бакъду, рицкъ, дуьненан ижу лоьхуш, юкъ – кара вовшца ойхьаза дуьйлуш меттигаш а нисло адамийн юккъехь. Оьг1азло, вас дика яц адмашлахь. Тахана – кхана х1ун хир ду а ца хуучу кху дуьненахь, вовшна  къинт1ера довла доьналла хила дезара вайгахь.   
…Нисса цхьа шо хьалха бакъ дуьнена вирзира 1еламшайхин Алихан.
 Регионехь. Махкахь. Россин арахь. Дуьненахь вевзаш – лоруш къонаха, дог ц1ена стаг, тешаме доттаг1,дикачу доьзалан да,  шеца яьхь, г1иллакх, оьздангалла йолуш вара иза. Спортсмен,  ц1ул т1аьхьа тренер, спортинтернатан директор.   Иштта вевзаш вара Алихан.
Хьаша-да, доттаг1ий, накъостий боцуш цуьнан йоккха ков -керт наггахь а хуьлуш яцара. 
Хала ду юкъара стаг д1авалар…  Алихан санначух къастар мелхо а деза нисло. Дог 1овжадо. Пхенашкахь ц1ий соцуш хетало. Лагчу шад х1утту. Б1аьргашчу хи  дуссу.
 …Денна вовшна гуш, лула – кулахь  лелаш хилча, вайн дага а ца тосу 1ожалло ц1еххьана  вайха милла а хьарчийна, вадийна   д1авуьгург хилар.
Алихан со журналистике вале дуьйна вевзаш вара суна. Цхьана эвлара а ду  тхо – Пхьаьрчхошкара. Ирс долуш стаг хета суна суо.  Кхолламо, балхо ишттачу  нахаца гергарло лелон сайна аьтто баларна. Цундела Дела хастам бо аса. «Вайна юкъара д1абевлларш бехаш бу, уьш вайн иэсехь мел бу», олуш ду – кх халкъалахь.
…Кхин цхьаъ а билгалдаккха луур дара тахана.  2014 – чу шарахь гуьйранца 1османюьртара Джанбеков Хьумайдаца Г1ырг1азойн махка даханера тхо. Нохчаша, г1алг1аша бехк боцуш кхойт шарахь хан – зама яьккхина оцу хийрачу махкахь. Мацоно,шелоно хийла адам х1аллакдина вайн цигахь.
Дуккхачу г1аланашка,  айылышка, вайнехан кешнашка   кхечийра тхо оцу шина к1иранахь. Бирлик юьртахь цхьа воккха стаг волчу хьошалг1а дигира тхо рузбанера  ара девлича. Тхуна мара а кхетта вилхира и стаг. Оьрсийн мотт ледара бийцарна а, тхо гарна хаза хетарна а,  ший а мотт эбеш буьйцура цо. Цкъа воьлура, юха д1ах1уттий воьлхура иза…
-Дагестан. Чечен. Алимшайх знаешь? – элира цо  уггар хьалха. Хороший, яхши человек, ветврач! Мы очень хорошо жили. Кунаками были. Салам айт ему, бохура цо…
Оцу хенахь 1еламшайх (шу марша) воцуш вара. Оха иза шега д1ахаийтича, цхьана ханна вист хила а ца луш висира г1ырг1азо. Цул т1аьхьа г1ийла вилхира…
Т1аккха Хьумаида д1ахьедира: «Его сын Алихан великий и известный в мире тренер по вольной борьбе! Основоположник борьбы в Дагестане. Очень уважаемый человек!»
…Дика стаг, коьмарша нах, тешаме доттаг1ий, мехкан доьналла долу к1ентий эхарта бирзина, вайна юкъара д1абовларах,  нахалахь биц лур бац. Уьш бехар бу вайн дегнашкахь, иэсехь…
Царех цхьаъ ву – кх 1еламшайхин Алихан. Х1ара байт стохка и д1аваьллачу деношкахь балоно дог 1овжорна язйинера ас. Кийрара чов – м х1инца а ю ерзаза, туха тесича санна 1ийжаш. Х1етте а, дисинарш 1ан  дезаш ду – кх… Иштта ду – кх дахаран, кхолламан, дуьненан, заманан сизаш…  Дала ялсаманехь цхьана тухийла вай, Алихан.        


ДОТТАГ1ЧУННА


1ожалло ц1еххьана хьарчавой д1авуьгу,
Де - буьйса ца лоруш оьккхуьйту керт.
Гергарнаш, доттаг1ий дог духий буьсу,
Цхьа яьсса юьсу-кха сел йоккха керт...


Воккха а, жима а къеставац 1ожалло,
Могий а, торий а ца хоьтту цо.
Г1иланиг вуьгу цо. Хиларах даржехь,
Хан - зама т1екхаьчнехь, хадабо гуо.


...Тахана доттаг1чух къастий со кхолламо,
Кийрара дог доьлхуш тезетехь лаьтта.
Суьйренца чувоьрзу юха а г1еллой,
Хьо санна доттаг1чух хала ду къаста...


Махко а, халкъо а хьо лоруш вара,
Хьайн дахар дерриг а царна д1адаларна.
Вайн Мехкан, къоман а хьо дозал дара,
Дог ц1ена адам хьо, Алихан, хиларна.


...Буьйса а д1аели. Уьдур ду денош,
Изаш а замано шерашка дерзор ду.
Денна хьо дагвог1уш, б1аьрхиш а 1енош,
Кхолламца ца къуьйсуш, д1аг1ертар ву.


Б1аьстенца малх кхетча, самдер ду латта,
Аьхькенца юха а кхуьур ду ялта.
Гуьйренца г1арг1улеш йоьлхур ю махкара,
1а дарах, доттаг1а воьрзур вац юха...


...Тахана хьан кошт1ехь со воьлхуш лаьтта,
Хилларш а, лелларш а дага а лоьцуш.
Хьо воцуш ваха сайн дацахь а атта,
Йоккхур ю, хан - зама кхолламца ца къуьйсуш...


Де кхаьчча 1ожалло хьарчор ву суо а,
Цу Делан кхелана реза ду вай.
Денна а готлуш бу дахаран гуо а,
1ожалло хададо цуьнан и тай...
16 – г1а декабрь, 2017 –г1а шо

Автор: Умар Якиев
Комментарии (0)
Добавить комментарий
Прокомментировать
Кликните на изображение чтобы обновить код, если он неразборчив
Нана
Нана
Нана
21.11.18 Общество
«Ненах къаьстича беран даг т1ера зезаг дужу», – олуш хезна суна жималлехь. Вуно нийса аьлла дешнаш ду уьш. Бер, мел яккхий халонаш т1ех1иттарх а, ирсе ду ненаца. Цунна
Вовшашца уьйр латтор ю
Вовшашца уьйр латтор ю
Вовшашца уьйр латтор ю
14.11.18 Общество
Д1адаханчу к1ирнахь Хасавюртара школийн нохчийн меттан хьехархоша д1аяьхьира семинар. Иза лерина яра нохчийн яздархочунна Гадаев Мохьмад-Селахьана. Хьалха санна, семинар
Нигат—халкъана  йовхо  луш  вахар…
Ас муха тоьгур дац вайнехан илли Дашочу кочарна тIе, Пхенашкахь нохчочун цIий кхехкаш хилча, Даймахко воI вича шен?
30-гIа октябрь – политически таIзарех хIаллакьхиллачеран иэсан де
Оцу дийнахь массанхьа д1аг1о политически та1зарша х1аллакьбинчу нахана лерина акцеш, иэсан мероприятеш. Ткъа Россехь уьш д1аг1о, 1991-чу шарахь дуьйна 30 октябрехь. И
Дахаро-м ойланаш гойту...
«Саиев Iумара, шен хIора байт (стихотворени) леррина, йорий—тоьгий, бустамашца кхолий, кечйой юьллу дешархочун кхиэле. Цундела уьш къаьсташ хуьлу шайн кIоргачу чулацамца











«    Июнь 2021    »
ПнВтСрЧтПтСбВс
 123456
78910111213
14151617181920
21222324252627
282930 
все шаблоны для dle на сайте dletop.com скачать