Россин Федерацехь мел йолу структураш а, 1едалан белхалой а, иштта, берриге а бахархой а шена т1етовжа дезаш, коьрта закон ду Конституци. Цуьнца доьзна хила дезаш ду пачхьалкхера дерриге дахар а.
Шеко йоцуш, Россин дезденойх коьртаниг ду х1ара – тахана вайн пачхьалкхехь даздеш долу Конституцин Де. Х1окху денна лерина тайп-тайпана мероприятиш хуьлу федеральни т1ег1анера схьа, муниципалитеташка кхаччалца, массо а маь1-маь11ехь – гоьрга стоьлаш, концерташ, патриотически акцеш, иштта д1а кхин а. Цигахь, коьртачу декъана, дийцаре до Конституцин мехалла.
Дагадоуьйту, 1993-чу шеран г1уран 12-чохь массо а халкъо резахиларца кхаж а тесина, т1еийцира Россин Федерацин Конституци.
Т1аьхьадог1учу шарахь оцухенахьлерачу президентан омраца, г1уран шуьйтталг1а де даздаран хьоле даьккхира. 1994-чу шарахь дуьйна, и де 1едалан белхалой мукъа буьтуш схьадеана. Амма, бакъду, 2005 шо оцу хьокъехь хийца делира. Оцу шарахь дуьйна, г1уран шуьйтталг1а терахь даздаран т1ег1анехь дисира, берриге а шайн белхаш беш 1ан беза, аьлла, ч1аг1дина.