Чекхдолуш ду рог1ера 2024-г1а шо… Дуккха а тайп-тайпана ойланаш йог1у коьрте, д1аг1ош долу шарех йоьзна йолу…
Нахана а ч1ог1а хала нисделира иза дуккха а аг1онашца. Вайн пачхьалкхахь а, дуьненахь а хуьлуш болчу массо а вон хиламашка хьоьжуш, х1оразза а сатуьйсу, т1едог1у шо кхечу кепара хир дац-те, аьлла. Амма…
Т1емаш чекх ца бовлу, къаьмнийн девнаш ду, адамаш цомгуш хуьлу… Шераш д1аоьху, амма синхаам бац, х1унда аьлча, вай массо а хуьлуш долчух кхоьруш ду, х1ун дан деза, муха даха деза ца хууш лаьтта…
Ма лаьа х1ара дуьне тийна хилийта а, вай массо а маьрша а, ирсе а дахийта а…
Хьалхе ма хаза а, дика а дехаш хилла вай: керлачу шаре сатуьйсуш а, сирла ойланаш йолуш а. Дика зама яра иза… Тийна… Къаьсттина, берашна. Баккхийнаш а дуккха а ирсе бара…
Таханлера т1екхуьу чкъор кхин тайпа ду… Цуьнца къамел дан волавелча, цецволу, мел синкхетаме бу уьш. Жима хила а, ловза а, вон х1уманан ойла ца йан а хан йу церан, амма тахана уьш кхечу кепара бу.
Суна даггара къахета таханлерчу берех… Цаьргахь дуккха х1ума ду: смартфонаш, компьютерш, амма церан бералла йац, х1унда аьлча, вайн дахарехь мел хуьлуш дерг гуш а, хууш а бу уьш. Дай-наной цаьрна шен йовхо, безам д1айала ницкъ кхочуш бац, йа кхуьуш а бац, ахча лахарца доьзна ду церан дерриге г1уллакх.
Цундела шайн лаамехь лаьтта бераш. Берашна самукъа ма оьшу. Ойла йо ас: «Х1ун хир ду царех кху дуьненахь?».
И цхьаъ ду. Шолг1а-делахь, газетах а, тхайн балхах а массийтта дош ала луур дара суна. Хууш ма-хиллара, редакцехь бакхий хийцамаш хилла т1аьххьарчу шерашкахь. Хьалха санна тхайн луург йаздан таро йолуш йац редакцин тоба, х1унда аьлча, тахана лакхарчу 1едало буьззинчу барамехь къастадо газетехь х1ун, муха йаздан деза.
Цул сов, цара шаьш бохург бен йаз ца дойта тхоьга — холдинган компане дехьа а даьхна, ч1ог1а 1уналла деш ду тхан балхана. 1едало вайна уггаре а хьалха лаьттачу г1уллакхах лаьцна — вайн район меттах1отторах – х1умма а яздан ца магадо. Х1ора а керлачу шарахь и бала д1абер бац-те, олий, сатуьйсу, амма цхьа а вайн пайденна хийцамаш ца хуьлу-кх…
Ткъа газетдешархоша тхуна сих-сиха бехк боккху Ауховски районах лаьцна кхоччуш йаз ца до аш, олий, амма х1ун дийр ду оха, тхуна ца магадойтуш хилча. 1едалан карахь ма ду тхо, х1ара парг1ат газет хилча-м, оцу вайн баланех бен яздийр дацара оха. Газет арадаккха ахча луш нах хилча, 1едало бохучуьнах пусар дийр дацара оха, вайна луььург зорба а тухур яра… Амма и аьтту бац тхан…
Газете язбала ца лууш дукха вайн нах бу, тхуна ца оьшу и, бохуш. Х1аъ, дик ду, нохчашна шен газет ца оьшу, аьлла, д1ачаг1а бакъо йу-кх 1едалан иза. Х1унда аьлча, шун газете язлуш адам дац, арадаьккхина х1ун до цунах, ала йиш ма ю церан…
Цундела тхоьх кхетар доьху оха, редакцин белхахоша.
Иштта ю рог1ера д1адоьдучу шерах лаьцна г1айг1ане ойланаш…
Ч1ог1а лаьа-кх керлачу шарахь дикачу аг1ор хийцамаш хилийта а, адамийн юкъахь машар хилийта а… Вайн т1екхуьучу т1аьхьенан дикачу кханене дегайовхо а ца юьту вай… Кхин х1умма ца оьшура-кх вайн…
Оха даггара декъалбо газетадешархой т1ейог1учу историн мурца – Керлачу Шарца! Массо а вочух лардойла вай везчу Дала! Могашалла а, машар а, синтем а болуш дахар а хуьлийла!