Кху деношкахь Дагестанехь шуьйра дийцаре деш ду 2024-чу шеран лахьанан беттан 12-чу дийнахь Х1инжа-г1алин статус хийцарх лаьцна долу низам. Статус хийца йезаш хиларан х1ун бахьана дара, цул т1аьхьа х1ун хийцалур ду — цу хьокъехь дийцира Дагестанан Республикин юстицин министран г1оьнчас Караченцев Сергейс.

«Меттигерчу самоуправленин структура нисйан йезаш хилар дукха хенахь дуьйна дийцаре деш ду. Х1инжа-г1алин к1ошташна муниципалитетийн функциш йаларо бахархой герга ца баьхна г1алин 1едална. Цуьнан бахархой шайн массо а баланашна г1алин 1едал бехке бо, уьш ца кхета, г1алас шен цхьайолу функциш к1ошташка д1айелла хиларх. Ткъа церан тоьъал ахчанан ресурсаш ца хиларна, шайна т1едиллина г1уллакхаш кхачам боллуш кхочушдан аьтто ца баьлла.
Меттигерчу 1едалан органийн бакъонаш а, уьш кхочушйар а шера а хила деза. Нагахь санна г1алин бакъонаш г1алин к1ошташца йекъахь, ахча цхьатерра декъа деза. Т1аккха кхин цхьа кхерам кхоллало – царна 1уналла дан хала хуьлу.
Цхьа а х1ума хийцалур дац бахархошна. Статус хийцайеллачул т1аьхьа, г1алин к1ошташ шина т1ег1анан 1едал йукъадалале хиллачу 1едалан кепе йухайерзор йу. Г1алин йа к1оштан хьаькамо х1ара йа важа сацам барх бала хир бац г1алин бахархошна. Цунна, г1алин вахархочунна, мехала ду шен ц1ахь ток а, хи а, газ а хилар, лифташ болх беш хилар, нехаш шен хеннахь д1айахар и д1.кх. а… Ткъа и тайпа хаттарш дика а, атта а д1адерзо йиш хир йу — цигахь цхьа структура йу шен ницкъаш а, финансаш а йолуш. Цунна т1ехьажийна бу Х1инжа-г1алин статус карлайаккхарца боьзна хийцамаш а.
БИБУЛАТОВА Iайнаъ