Республикан эскаре кхайкхаран комиссин а, НР-н Оперативан штабан а цхьаьнакхетар д1адаьхьира лахьанан беттан 25-чу дийнахь Дагестанан куьйгалхочо Меликов Сергейс.

Цо хаам бира Россин Турпалхочун лаккхара ц1е йелла Исбакиев Магомедна, аьлла. Магомеда гайтинчу хьуьнарх лаьцна дийцира вай пачхьалкхан куьйгалхочуьнга Путин Владимирца хиллачу цхьаьнакхетарехь цуьнан т1еман накъосто.
Исбакиевс шен тобанца 24 сахьтехь 20 бронетехника а, 200 сов мостаг1 а х1аллаквира — шен масех чов хиллехь а, кхид1а а куьйгалла деш вара тобанна. Шен са д1аделира Магомедас цигахь. Иза д1авоьллина Москохна гергарчу Мытищи олучу т1еман мемориалан кешнашкахь.
Меликовс дийцира эскархочун доьналлех, Гаджимагомедов Нурмагомед дуьххьарлера Дагестанера схьаваьлла Турпалхо вуй, дагадаийтира.
«Вай дозалла до вайн 13 к1антах — Россин Турпалхойх. Владимир Владимировича, цхьа а шеко а йоцуш, сацам бира, Магомедна йеза ц1е лур йу, аьлла. Ткъа х1инца и сацам т1еэцна. Президентан омраца Магомедна Россин Федерацин Турпалхо ц1е йелла! Ша делла дош муха кхочушдо, кхин цкъа а гойту вайн пачхьалкхан президенто», — элира Меликовс.
Республикера бахархой эскаре г1уллакх дан кхайкхар а дара кхеташонехь айдинчу хаттаршна йукъахь. Карарчу хенахь эскаре кхайкхаран кампани д1айолаелла, иза лаьттар йу г1уран бутт чекхбаллалца. 2006-1994-чу шерашкахь дуьненчу бевлла болу кегийрхой бу эскаре баха безаш.
ДР-н куьйгалхочо билгалдаьккхира, президенто билгалдаьхна декхарш а, сацамаш а кхочушбан массара а къахьега дезаш хилар.
Республикин т1еман комиссаран декхарш кхочушдечу Мурадханов 1абдурахьмана къамел дира меттигерчу кхайкхаран комиссеша бечу балхах лаьцна. И г1уллакх республикан куьйгалхойн 1уналлехь ду.
Эскаре кхойкхуш берш лерринчу т1еман операцехь дакъалоцуш хир бац, аьлла, хаам бира Мурадханов 1абдурахьмана.

БИБУЛАТОВА Iайнаъ
РД-н куьйгалхочун
Администрацин сурт