Къоман проекташца цхьана а йог1уш, республикехь йеш йолчу образованин г1ишлошна лерина кхеташо д1айаьхьира Меликов Сергейс. Цхьанакхетарехь дакъалоцуш бара правительствон а, профильни ведомствийн а белхахой.

Баьхкинчаьрга вистхуьлуш, регионан куьйгалхочо довзийтира карара шарахь белхаш д1ахьош болчу образованин объекташах лаьцна. «Дагестанехь 43 г1ишло йу йеш. Царах 30 ишкола йу, ткъа 13 берийн бошмаш йу. Дешаран шо доладалле царах дукхаха йерш кийча хир йу. Бакъду, йисинчаьрна т1ехь шайн графикаца бан беза белхаш бийр бу.
Суна кхайкхам бан лаьа строительни белхаш д1ахьош болучаьрга. Оцу туьшашкахь деша дезарш вайн бераш ду. Дешаран шо доладала йисинарг дукха хан йац. Аша шайн болх доггаха бан беза. Йиллина йолу план ца йохош, эзарнашкахь дешархой керлачу ишколашка а, берийн бошмашка а г1ур болу хьал д1ах1отто деза вай.
Нагахь санна строительни белхаш бан ма безза ца бахь, бехке берш жоьпалле кхойкхур бу, дезахь г1уда а тухур ду. Х1унда аьлча, «хьалхара горгали» мероприяти хилале берриге а кечамаш бина хила безаш бу», — т1еч1аг1дира Меликов Сергейс.
Цул т1аьхьа, оцу объекташ т1ехь строительни белхаш д1абахьарах лаьцна довзийтира архитектурин а, ЖКХ-ан а, строительствон а ханна декхарш кхочушдеш волчу Уллаев Бахтияра. Цо дийцира, муьлха объект х1ун хьолехь йу а, царна т1ехь кхочуш дина даьлларг а, дан дезаш дисинарг а. Цуьнан докладаца нийса а дог1уш, тахана а схьайелла кийча йерш а йу, иштта, х1инцца йолинарг а йу. Цо билгалдарехь, белхаш д1абоьрзар бац хила ма-йезза ишколаш а, берийн бошмаш а д1ах1итталца.