Хьаж дечунна хьехам

ХьаьжцΙа Веза Воккхачу АллахΙан сийлахь а, маьрша а цΙа ду. Бусалба стагана кхочушдан тΙедиллинчу пхеа парзах цхьаъ ду ХьаьжцΙа вахар, цигахь Сийлахьчу АллахΙана Ιибадат дархьама.   Везачу АллахΙа аьлла: 
«Баккъалла а, нахана уггар хьалха доьгΙна цΙа Маккахь дерг ма ду, ша Ιаламна беркате а, нийсо йолуш а кечдина долу. Цуьнгахь бу (АллахΙ-Дела хиларна тоьшалла деш болу) билгала хаамаш – ИбрахΙиман макъам (ИбрахΙим-пайхамар /Делера маршалла хуьлда цунна/ дΙахΙоьттина хиллачу меттиган лар), цу чу ваханарг тешаме хир ву. Дала адамашна тΙедиллина ду, некъаца цига ваха аьтто болчунна, ХьаьжцΙа вахар, ткъа керсталла диначунна, баккъалла а, АллахΙан Ιаламера оьшуш хΙумма а дац» («Алу  Ιимран», 96-97)


ХьаьжцΙа вахаран гΙиллакхаш


 1.Хьаж дечо а, Ιумрат дечо а шен хьаж дарца а, Ιумрат дарца а Веза Воккха АллахΙ резахилар лахаран а, Цунна герга хилар а нигат дан деза, иза ларвала веза дуьненан бахам лаха а, дозаллина а, шен йоккха цΙе яккхийта а  цига вахарх. 
2. Новкъа волучо весетан кехат яздан деза, шена тΙехь долу декхарш а, шена декхаре берш а дΙаязбан беза цо. Шега Ιалашъян елла хΙума елахь, иза долахь йолчуьнга дΙаяла еза, я цуьнгара пурба даккха деза, и хΙума ша волчохь йита аьлла, хΙунда аьлча  дуьненчохь вай йоккху хан Сийлахьчу Делан карахь ю.
3. Шегара дийлинчу къиношна а, яьллачу Ιесаллина а тоба  дар а, царах хьалха динчунна дохковалар а, кхин ишттаниг долуьйтур дац аьлла, шен ойла чΙагΙъяр а.
4. Ша нахана дина зенаш меттахΙиттор, шегахь цхьаьннан даьхни делахь, я ша цхьаьннан сий дойуш дош аьллехь, цо цаьрга шена гечдар деха деза, уьш шена къинтΙера баха беза.
5. Шен Хьаьждарна я Ιумратна новкъа даккха хьанал долу цΙена напха лахар, хΙунда аьлча АллахΙ цΙена ву, цΙена дерг бен къобалдеш а вац Иза.
6. Ιеса мел долчу хΙуманах ларвалар, шен маттаца а, куьйгаца а цхьанна а зулам цадар. ХьаьжцΙа вахча, оьзда лелар, цхьанна а новкъарло цаяр, гΙийбаташ цадар, девнаш цадахар, хьаштдоцург а, Делан хьокъехь шена цахуург а цадийцар. 
7. ХьаьжцΙа воьдучо дерриге а декхарш Ιалашдан деза. Царах уггаре а коьрта дерг шен хеннахь жамΙатехь ламаз ду. Иштта денна а Къуръан деша деза цо, дуккха а зуькар а, доΙа а дан деза, дашца а, гΙуллакхца а нахана алсам дика дан а деза. 
8. ХьаьжцΙа ваха новкъа волург оьзда гΙиллакх а, собар а долуш, нахана къинтΙера ваьлла, къинхетаме, кΙеда-мерза, дош кхочушдеш, комаьрша, эхь-бехк долуш, нахана муьтΙахь а, диканиг дан гΙерташ а  хила веза. 
9. Иштта некъахочо шен доьзале Сийлахьчу АллахΙах кхоьруш хила аьлла, весет дар суннат ду.
10. Некъахочо даима доьшуш лело деза Мухьаммад-Пайхамарера (Делера салам-маршалла хуьлда Цунна) схьадеана долу доΙанашший, зуькаршший. Царна юкъахь ду некъахочун доΙий, цхьана хΙуманна тΙехууш деш долу доΙий. 
                   
 Некъан доΙа


(Хьалхара доΙа):


 АллохΙу Акбар, АллохΙу Акбар, АллохΙу Акбар 
  Субхьаналлази саххоро лана хΙаза ва ма кунна лахΙу мукъринина.  Ва Инна ила роббина ламункъолибуна.
(ШолгΙа доΙа):
  АллахΙума инна нас-алука фи сафарина хΙаза аль-бирро ваттакъва, ва миналь-Ιамали ма тардо, АллохΙумма хΙаввин Ιалайна сафарона хΙаза ватΙви Ιанна буΙдахΙу, АллохΙумма антассохьибу фиссафари Валь-холифату филь-ахΙли, АллохΙумма инни аΙузу бика мин ваΙсаиссафари, ва каабатиль-манзори, ва суиль-мункъолаби филь-мали, валь-ахΙли.
Цхьана хΙуманна (говр, эмкал, машен, цΙерпошт, хинкема, хΙаваан кема) тΙехууш деш долу доΙа
   
(Хьалхара доΙа):


 БисмиллахΙ, алхьамду лиллахΙ. 
Субхьаналлази саххоро лана хΙаза ва ма кунна лахΙу мукъринина. Ва Инна ила роббина ламункъолибуна.


(ШолгΙа доΙа):


Альхьамду лиллахΙ, альхьамду лиллахΙ, альхьамду лиллахΙ.
АллохΙу Акбар, АллохΙу Акбар, АллохΙу Акбар.
СубхьанакаллохΙумма инни золамту нафси фагΙфир ли фа иннахΙу ла йагΙфируззунуба илла анта.