Газет доцуш диса кхерам бу вай...

Кхоьссина топ санна д1ауьдучу кху заманахь а, кху харцчу дуьненахь а со цецвала цхьа а тайпа х1умма дац, бохуш, 1аш волчу суна, цхьа х1ума тамашена хета (?!) – нохчийн мотт  а буьйцуш, нохчий ду а бохуш долу вай – цхьаъ бен доцчу «Нийсо» газете язлуш дац бохург дагах  1аьт1къа сан (?!).  

2 –чу августехь, 1990 –чу шарахь («Халкъан Аз») ц1е йолуш арадала доладелира вайн газет. Массо Дагестанехь бехаш болчу нохчашна боккха кхаъ бара и. Цу хенахь дуьйна газет яздеш и доьшуш схьавог1уш а ву со, сан гергарнаш.
Уггар халахеташ дерг,  х1ора шарахь газетан тираж к1езиг хилар ду. Вайн республикехь кхин цхьа а информационни г1ирсашкахь (газеташ, телевидени, радио) яц  вайх дог лозуш,  къоман проблемаш юьйцуш. И дерриг иштта дуй хуъушшехь,  ир дина диг санна,  дуьхьал а  девлла и газет ца яздо вайнаха.
Х1ора доьзалехь массеран ц1арах телефонаш ю вайгахь. Цаьрна т1едилла ахча карадо вай. Амма газет хьахийча, б1аьгор бог1у – кха вайна. Муха кхета веза ишттачух(?!)
Кхин цхьаъ ала а деза кхузахь. Газет яьрташкахь шен хеннахь ц1а кхачош дац. Масуьйттаза коьртачу редакторе 1абдулнесаран 1умаре а д1ахьедина ас и г1уллакх. Редацен бехк бац кхузахь, олий а хета, х1унда аьлча газет шен хеннахь ара долуш ду.
Цхьаъ бен доцу газет тесса дита вайн бакъо яц боху сан даго. Сема довла,х1ай, нах.  Иштта х1ара хьал д1аг1ахь, газет доцуш диса кхерам бу вай!