30-гIа октябрь – политически таIзарех хIаллакьхиллачеран иэсан де » Нийсо-Дагестан
sitename
Курс валют предоставлен сайтом old.kurs.com.ru
Видео
Свежий номер газеты


30-гIа октябрь – политически таIзарех хIаллакьхиллачеран иэсан де
24.10.2018 328 0 niyso

30-гIа октябрь – политически таIзарех хIаллакьхиллачеран иэсан де

Общество
В закладки
Оцу дийнахь массанхьа д1аг1о политически та1зарша х1аллакьбинчу нахана лерина акцеш, иэсан мероприятеш. Ткъа Россехь уьш д1аг1о, 1991-чу шарахь дуьйна 30 октябрехь. И мероприятеш д1аяхьар коьртачу декъана доьзна ду вайн махкахь 1937-1938-чуй а шерашкахь д1адехьначу та1заршца. «Мемориал» олучу бакъонашларъяран центран хаамашца Россехь карарчу хенахь х1инций а дийна бу 800 эзар гергга оцу та1зарех чекхбийлинарш, оцу юкъахь ду иштта церан бераш а. Цу декъехь, хууш ма-хиллара, т1еэцна ду  «Политически та1зарш динчарна реабилитации яран хьокъехь долу закон» а. Ала деза, цул хьалха цхьамогг1а политически хиламаш хилла Советийн заманахь вайн махкахь. Иштта 1987-чу шарахь яккхий демонстрацеш д1аяхара Москвехь, Ленинградехь, Львовехь, Тбилисехь, иштта кхечу г1аланашкахь. Кхо эзар гергга стаг лаьттира СССР-н КГБ-н г1ишлонна гонах а. Х1ора шарахь и мероприятеш Москвехь д1ахьо Соловецки т1улган уллехь. И гранитни т1улг кхуза схьабеана Соловецки г1айренашкара, Соловецки лагерь хиллачу меттера. Иза д1ах1оттийна 1990-чу шеран 30 октябрехь ВЧК-ОГПУ НКВД – КГБ-ФСБ г1ишлон хьалха йолчу Лубянски майданахь. Соловецки г1айренех лаьцна хьаххийнчуьра. Сан ирс хилла цигахь хила, цигахула лела а. И дара 1972-г1а шо, аьхкенан каникулашкахь. Оцу хенахь со доьшуш вара Нохч-Г1алг1айн пачхьалкхан университетехь. Оцу хенахь вайн махкахь шуьйра даьржина дара студентийн г1ишлошъяран отрядаш вовшахтохар, цаьрга халкъан баханаман г1ишлошъяран декъехь болх байтар. Иза ч1ог1а пайдехь х1ума дара шайна студенташна а, иштта махкана а. Коьртаниг, студентийн таро хуьулура кепек яккха, цуьнца цхьана шайн дай-наношна г1олаца. Цхьана шалонна т1ехь Г1розный г1алара Кареле дигира тхо, университетан студенташ а, иштта кхечу заведенийн дешархой а. Тхо кхузарчу Кемски районерчу хьуьнчу охьадиссийра, 1ер-дахарна цхьа а тайпана хьелаш доцуш. И хьун а хьокхуш, цуьнах материалаш кечъеш, йоккха автобаза йог1а дезара тхан. Цхьа-ши к1ира д1адаьлчи, тхуна юкъарчу зудаберех вовшахтуьйхира къаьстина йолу отряд – 40 сов стаг. «Белое» олучу х1ордан йистехь лаьттачу Рабочеостровск поселкехь хьалаюг1учу школана штукатурка ян езаш дара оцу отрядан. Царна г1оьнна пхи-ялх божабер а дара къасто дезаш. Цу юкъа нисвелира сайн лаамаца со а. Цхьана баттахь а, ах баттахь оцу школан г1ишлонна штукатурка йира тхан зудабераша, оха г1о а деш. Оцу балха т1ехь дика къахьегарна тхуна совг1ат а дира, вуьшта аьлча, Соловецки г1айрене дига. Вуно тамашена меттигаш гира тхуна цигахь. Коьртаниг, тхо хилира г1араяьлла йолчу Соловецки монастырехь. Меттигерчу гидо дийцарехь, цигахь 1929-чу шарахь дуьйна т1аьххьалца а лаьттина хиллера Советски концлагерь (СЛОН). Цигахула тхо лелаш, тхуна т1евеара цхьа воккха стаг – оьрсий. Тхо мичара даьхкина  хиънера цунна, тхан студентийн форманашца (духарца). - Кхузахь дукха к1айн куйнаш долу шун махкахой х1аллакьхилла, - бохуш, дийцира тхуна оцу къаночо. Суна т1аьхьо хиира, Соловецки г1айрене кхаьчнарг, вуха вог1уш ца хилар. Царна юкъахь нисбелла сан дехойх болу гергарнаш а, 1938-чу шарахь цхьа туркойн эмиссар кхаьбна аьлла д1а а бигна, т1епаза байнарш. Церан т1аьхьенаш тахана а йолуш ю тхуна юкъахь. Ткъа 1944-чу шарахь-м кхин а даккхий зиэраш лан дийзина вайн дайшна – дерриге халкъ махках а даьккхина, Сибреха хьажор. Уьш дерриш а лайна вайн дайша, вуьшта, х1инций а вайн бакъонашка кхаьчна дац вай, халахеташ делахь а. Цуьнан а цхьа де хир ду. Бакъо толаза юьсур яц. Цуьнах тешна ду вай, Даламукъалахь!
Автор: Салвади Баймурадов
Комментарии (0)
Добавить комментарий
Прокомментировать
Кликните на изображение чтобы обновить код, если он неразборчив
Дахаро-м ойланаш гойту...
«Саиев Iумара, шен хIора байт (стихотворени) леррина, йорий—тоьгий, бустамашца кхолий, кечйой юьллу дешархочун кхиэле. Цундела уьш къаьсташ хуьлу шайн кIоргачу чулацамца











«    Август 2020    »
ПнВтСрЧтПтСбВс
 12
3456789
10111213141516
17181920212223
24252627282930
31 
все шаблоны для dle на сайте dletop.com скачать