Стаг гIиллакхо хазво » Нийсо-Дагестан
sitename
Курс валют предоставлен сайтом old.kurs.com.ru
Видео
Свежий номер газеты


Стаг гIиллакхо хазво
12.02.2020 107 0 niyso

Стаг гIиллакхо хазво

Общество
В закладки
Цкъа юьхьенца дукха хан йоцуш сайна гинчу цхьана хIуманах лаьцна дуьйцур ду ас.Тхан юрт тIаьхьарчу хенахь йоккха хилла йогIу. Ерриге а Нохчийчохь санна, дуккха а керла цIенош ду кхузахь деш, кхоллалуш къона доьзалш бу. Кегийчеран аьтто хилча, вайна, баккхийчарна, хазахета, уьш вайл а дика баха лаьа. Ткъа муха хуьлу церан вовшийн довзар а, дистхилар а, дагара хаийтар а? Хьалха санна, хинан йистехь я синкъерамехь, ловзаргахь гар ма ца нисло хIинца. Гар, дистхилар дагахь доцчу меттигехь, цецваллал долчу хьолехь нислуш а хуьлу церан наггахь. Со вехаш волчу урамна тIебогIучу боцачу урамехула цIа вогIуш ву со хьастагIа. Цу жимачу урамехь комаран дитта кIелахь аннех гIант дина тхан куьпара кхиазхоша. Сарахь цу гIанта тIехь сакъоьруш Iа уьш. Церан сакъерар муха хуьлу? Юуш чипсаш, морожнеш, кхийолу хIуманаш, молуш мутташ, пепсиш,колаш хуьлу. Ерриге а нехаш, шишанаш оцу гIантана гонах а, шайн когаш кIел а охьакхуьссу цара. Кегийнаш-м цхьанна а новкъа бац, шайга телефонаш лелаяйтичхьана цхьана а деца бала а бац церан. Уьш массийтта велахь а, хIорра а шен телефона «чохь воллуш» хуьлу. Иза ду церан сакъерар.
Дерриге а дика дара цу кхиазхойн, шаьш Iачохь нехаш ца яржаяхьара. ТIехволучо ала а олу, оьзда лела олий, амма бохург дIалоцуш кIезиг бу царна юкъахь. ГIиллакх хIун ду а ца хаьа цхьаболчарна. Оцу гIиллакхах лаьцна дийца лаьара суна.
Иштта, со схьавогIучу хенахь дитта кIеларчу цу гIанта тIехь Iаш кхиина даьлла кIанттий, йоIIий го суна. Схьагарехь, дагара дуьйцуш ду и шиъ. ХIинца кегийчара ма-аллара, «свидани деана». «Да ватIа шен делаI, кхин бегIийла меттиг ца карийна те кху шинна дистхила? – олий, дагадогIу суна, генара царах бIаьрг кхетча. – Оцу нехашна, чалхана юккъе а хиина, цIена безам муха буьйцур бу?» Иштта цу балхах цецваьлла волу со юххе нисвелча, гIиллакхна хьала а ца айадели и шиъ, ур-аттал схьа-м ца хьаьжи! Шаьшшиъ ма-Iарра, дуьхь-дуьхьал а дирзина, къамел деш IадIий-кха.
«ЦIе хала хьо белхан! И хIун дара суна гинарг? Кхузткъа шо герга хIокху юьртахь вехаш, суна гина хIума ма дац иза. Нохчийн гIиллакх дIадаьлла те?» – ойла йо ас. Цкъа, сецна, шуьшиъ хьенан мила ду ала дог хуьлу сан, тIаккха а сел ледара долчу цаьргара суна цхьа а нийса жоп хир дац я цара дийцича а, со арз эцна ваха а ца воллу, олий, дIавоьду со.
Мича дахана те нохчийн гIиллакх? Дала-м ца делла те иза? Вай даха, делла дIа ца даьллехь а, вочу хьоле-м дирзина. ГIуллакх иштта дIагIахь, цуьнан лар а ца йиса там бу вайна юкъахь. Ткъа мила ву бехке, вайн гIиллакх дIадолуш хилча? Вай ду-кх, вай ваьш. Кхечу махкара баьхкинчу хийрачу наха дохош ма дац иза. Вай дохош ду. Лар ца дича, лела ца дича, кегийчаьрга Iама ца дайтича, доьхний ма ду иза.
Соьца (сан метта кхин милла а хила тарлора) оьзда йоцу кеп ялийначу кIантана а, йоIана а мелла а гIиллакхаш девзаш хила тарло. Делахь а шайна ца вевза стаг тIехволучу хенахь хьала ца гIаьтти ишиъ, бехк лаьцна, тIехьа ца дирзи. Цара гIиллакх лелор дара иза шайн цIийца хиллехь, денна лелош а хиллехь. Вайна новкъахета кегийчара цу тайпа ледарлонаш йийлийтича, уьш бен а боцуш лелча. Амма уьш кхиор, царна гIиллакхаш Iамор баккхийчаьргахь ду. Шен доьзалхо чохь а, арахь а муха ву те, цо хIун леладо те аьлла, бала кхочуш хила деза да-нана а, доьзалан верас а.
Хьалхалерчу заманашкахь оьрсийн халкъалахь леррина лелош хилла шайн къоман гIиллакхаш. Дас аьлларг кхочушдеш, цунна дуьхьал дош ца далош, чIогIа низам хилла церан доьзалехь. Шегара ледарло ялийтинчунна, цадогIург лелийначунна, жима я воккха вара аьлла ца Iаш, доггIу таIзар деш хилла. Шайн юкъараллехь а, лулахь а ширачу заманашкахь дуьйна схьадогIу дика гIиллакхаш лелош хилла оьрсаша. Цундела цу хенахь церан доьзалшкахь чIагIделла низам а, къепе а хилла.
Хан-зама яьлча, дуккха а хIума бIостанехьа хийцаделла цу къоман гIиллакхашкахь. ХIинца церан кегийчара шайна луъург леладо, да-нана, йиша-ваша тергал а ца до, дукхахболчеран Делаца а, динаца а бала а бац, гIиллакхаш а, оьздангалла а дIаяьлла йогIу.
Ас и масал хIунда далийна? Оьрсийн къомана а, нахана а вониг ала гIерташ вац со. Церан метта муьлхха а кхин нах хила а ма тарло. Мел лерина лелийна хиллехь а, лар ца дича, тIаьхьене дIа ца делча, дIадолу муьлхха а гIиллакх, телха доьзалан юкъаметтигаш. Доьзал боьхча, юкъаралла а талха герга ю. Къам доккха я жима дара аьлла а дац иза. Нехан шен къоман культурица бала хилар, цуьнца доьзнарг Iалашдар, тIаьхьенашка, лардеш, дIакхачийтарца доьзна ду иза.
ХIора къоман шен тхьамданаш, лараме, бевзаш нах хуьлу. Уьш хила тарло баккхий политикаш, депутаташ, динан дай, бизнесменаш, яздархой, артисташ. Юкъараллин дахарехь дуккха а хIума ду церан балхах а, дуьнене болчу хьежамех а, къоман культуре церан йолчу уьйр-марзонех а доьзна. ХIунда аьлча халкъ шен тоьллачу нахе хьовсуш а, ладугIуш а ду. Церан дахарх масал эца гIерта могIарера адамаш. Халкъан векалша, наха лоручара дIакхехьа деза, аьлла хета суна, шайн культура а, цуьнца доьзна дерг а Iалашдар а, даржор а.
Къаьсттина чIогIа ларбан безарг мотт бу. Зорбанан хьостанашкахь а, телевиденехь а, радиохь а вай дукха дийцина цунах лаьцна. Иза дийца а, тергонехь латто а дезаш гIуллакх ду, хIунда аьлча вайн къоман юкъара лазам бу иза. Тахана нохчийн маттаца долу хьал вайна ма-лаъара дика дац. Иза дика хилийта ницкъ кхочург дерриге а дан деза вай.
Ненан мотт стенна оьшу бохург дийца оьшуш а дац. Адамийн вовшашца уьйр латторан а, дахаран массо а агIо кхиоран а хьоста хилла ца Iаш, вайн гIиллакхаш лелоран, лардаран гIирс а бу иза. Ненан маттехула девза жимачунна дерриге а диканиг, халкъан иэсехь гулделларг. Цу юкъахь къоман гIиллакхаш а ду. Цундела ду мотт ларбар Iаламат мехала а, оьшуш а гIуллакх.
Вай олу: «Цивилизацино йохайо къаьмнийн хьалхалера дахаран кеп». Иза бакъ ду. Цивилизацино хуьйцу вайн дахар, керл-керла хIуманаш юкъадалош, адамийн юкъаметтигаш галморзахйоху, уьйраш малйо. Амма вай лелийча, лардича, цхьана а цивилизацино вайн гIиллакхаш дохор дац. Церан керла кепаш хила а тарло, уьш мелла а хийцадала а тарло, амма уьш дуьсур ду халкъалахь. Ткъа уьш лардар вайн уггаре а даккхийчех цхьа декхар ду.
Дерзош, ширачу заманахьлера цхьа масал дало лаьа суна. Жимачу АтагIахь хилла бохуш, хезна суна иза. Iабдул-МутIелип цIе йолуш, цхьа жима стаг хилла цу юьртахь вехаш. Эвлан лахахьа агIор, бенойн куьпахь, тIехьийза йоI хилла цуьнан. Тоьлла духар а духий, леррина шен дин а кечбой, йоIана ирахьIан воьдуш хилла Iабдул-МутIелип. Ша беной бехачу ураме дIакхаьчча, меллаша говрара охьа а вуссий, цуьнан юьхь а лоций, гIаш дIавоьдуш хилла иза тIехьийза йоI йолчу. Цкъа-делахь, цу йоIе а, цуьнан нахе а шен ларам хилар, шолгIа-делахь, шен оьздангалла, дайн гIиллакхаш ша ларар гайтина цу оьздачу къонахчо. Иштта яьхь йолу, гIиллакхе кIентий лаьттийла вайна юкъахь даима а!

Автор: АРСАНУКАЕВ Муса
Комментарии (0)
Добавить комментарий
Прокомментировать
Кликните на изображение чтобы обновить код, если он неразборчив
Мотт ца хуу безам
Мотт ца хуу безам
Мотт ца хуу безам
22.01.20 Общество
Аьхкенан юьхь яра. Дала Шен 1аламан хазалла, дуьне мел ду д1аса а яржийна, адамашка цунах марзо оьцуьйту хан. Сийначу стигалахь, маь1-маь11ехь нисбеш, охьабиллинчу
Оьзда стаг яра хьо...
Оьзда стаг яра хьо...
Оьзда стаг яра хьо...
18.09.19 Общество
Сан нанас вина цхьаъ бен ваша ца висарна гуттар а сингаттам бара сан кийрахь. Амма хьо могуш йолуш самукъа долура. Хlунда аьлча, итт вешин механа хьо хетарна.
Акказин хьожа
Акказин хьожа
Акказин хьожа
30.05.19 Общество
Больница йоккха, хаза гуш яра. Керла гIишло, Москвахь елахь а Россин йоцийла къаьсташ дара. «Американская клиника....» иштта кхиндIа а ехха яра цуьнан цIе. Мехах дарба
Гонаха тийна ду
Гонаха тийна ду
Гонаха тийна ду
17.04.19 Общество
Петаран догIанаш дайар, хIара ду аьлла, доккха халахетар а дац, нагахь доьзалехь, я балхахь стоьлан гIутакха чохь, я, масала, лулахошкахь охьадехкина уьш кхин а делахь.
Европа
Европа
Европа
28.11.18 Общество
Декъаза маре дара Зулайс динарг. Ялхитта шо бен дацара цуьнан, костом-хечий, кIайн коч юьйхина, цIен галстук оьллина, йоккхачу предприятин директор ву аьлла, хIара Iеха











«    Июль 2020    »
ПнВтСрЧтПтСбВс
 12345
6789101112
13141516171819
20212223242526
2728293031 
все шаблоны для dle на сайте dletop.com скачать