Лахьанан беттан 3-чу дийнахь Меликов Сергей цхьаьнакхийтира г1араваьлла боксхочуьнца, дуьненан абсолютни толамхочуьнца Бетербиев Артурца а, цуьнан тобанан декъашхошца а.

Регионан куьйгалхочо ша ч1ог1а хазахетта ву Бетербиевс Бивол Дмитрийгара толам баьккхина, аьлла, хаам бира.
«Со юьххьера дуьйна чаккхенга кхаччалц хьаьжира оцу къовсаме, массо а боксан фанаташ санна. Бакъдерг аьлча, Бивол дика кечам бина вара, амма Артур тоьлуш хилира».
Меликовс Артуре д1ахаийтира, Дагестан а, Нохчийчоь а, ерриг Кавказ а цунна г1ортор йеш йуйла.
«Оха массара а хьо тхайн боксхо, тхайн махкахо, тхайн ваша лору, тхуна ч1ог1а хазахета толам хьан хилар», — элира Меликовс.
Спортхочо элира, шен ког лазор бахьана долуш, новкъарло хилира латарна кечамбарехь.
«Х1ара лакхарчу т1ег1анехь къовсам бара, боккъал а хала дара. Иштта операци йинчул т1аьхьа когаца а проблемаш хилира сан. Амма спортехь уьш йоцуш ца хуьлу», — билгалдаьккхира Бетербиевс.
Массо а дагестанхойн ц1арах баркалла а аьлла, декъалвира боксхо республикан куьйгалхочо.
— Дала могашалла лойла хьуна, Артур! Ког то а белла, керлачу ницкъаца тренировочни зала чу йухаверза войла хьо! Хьоьх баккхийбеш дукха нах бу хьун Дагестанехь. Нагахь санна, реванш хилахь, ахь толам баккхарна шеко йац сан. Дагестан хьан даймохк бу, кхузахь хьуна а, хьан доьзална а даима г1ортор хир йу. Шу ч1ог1а лору оха, муьлххачу а хьолехь шуьца хила даима а кийча ду тхо», — ч1аг1дира регионан куьйгалхочо.
Меликов Сергейс Дагестанерчу исбаьхьаллин меценатийн ц1ерах совг1ат дира Артурна квартиран сертификат йаларца. Ткъа спортхочун дехарца, регионан куьйгалхочо видеохаам д1айазбира Артуран нене, цо иштта к1ант кхиорна баркалла олуш.
Спортхочо доккха баркалла элира Меликовн шен тидам т1ебахийтарна а, хаддаза г1ортор йарна а.